នៅក្នុងជីវិតរស់នៅនិងកន្លែងការងារចាំបាច់ត្រូវមានទំនាក់ទំនង។ មនុស្សធ្វើការប្រាស្រ័យទាក់ទងគ្នាភាគច្រើនតាមរយៈ ការនិយាយ ការសរសេរ កាយវិការ និងទឹកមុខជាដើម។ ការប្រាស្រ័យទាក់ទងល្អ អាចជួយឲ្យយើងសម្រេចនូវគោលដៅបានដោយងាយ។ តែជំនាញក្នុងការប្រាស្រ័យទាក់ទងនេះ គឺមិនអាចចេះដោយឯងៗនោះទេ វាត្រូវការសិក្សារៀនសូត្រ និងប្រតិបត្តិជាប្រចាំទើបគ្រប់យ៉ាងអាចប្រព្រឹត្តទៅបានដោយជោគជ័យ។ សូមចាំថា ការនិយាយជារឿងងាយ តែការនិយាយឲ្យបានត្រឹមត្រូវមិនមែនជារឿងងាយនោះឡើយ។ មនុស្សគ្រប់រូបធ្វើការប្រាស្រ័យទាក់ទងក្នុងគោលបំណងដើម្បី ផ្ដល់ព័ត៌មាន បង្ហាញពីអារម្មណ៍ លើកទឹកចិត្ត និង គ្រប់គ្រង។ ដូច្នេះដើម្បីឲ្យការប្រាស្រ័យទាក់ទងរបស់យុវវ័យ ជាមួយអ្នកដទៃទទួលបានជោគជ័យ អ្នកត្រូវអនុវត្តគន្លឹះជាយុទ្ធសាស្ត្រមួយចំនួនដូចខាងក្រោម៖
១. ភាពទាក់ទាញដំបូង
ត្រូវស្លៀកពាក់ឲ្យបានស្អាតបាត ថ្លៃថ្នូរ ទឹកមុខស្រស់ស្រាយ និងកាយវិការសមសួន។ ធ្វើបែបនេះ ជាចំណុចទាក់ទាញដំបូងបំផុតរបស់មនុស្សទូទៅ។
២. ចរិយា មារយាទ
ប្រកាន់ចរិយា មារយាទថ្លៃថ្នូរ និងមានវិន័យក្នុងខ្លួនជានិច្ច។ បើចរិយា មារយាទមិនល្អ មិនដឹងខុសត្រូវ ចាស់ក្មេងទេនោះ ក៏គ្មានអ្នកណាចូលចិត្តធ្វើទំនាក់ទំនងជាមួយអ្នកដែរ។
៣. សុជីវធម៌
សុជីវធម៌ គឺជារឿងដែលមិនអាចមើលរំលងបានទេក្នុងការប្រាស្រ័យទាក់ទង។ ពេលធ្វើការប្រាស្រ័យទាក់ទង ត្រូវមានការគោរពនិងផ្ដល់តម្លៃគ្នាទៅវិញទៅមក ។
៤. ភាពស្មោះត្រង់
សូមចាំថា បើអ្នកកាន់តែស្មោះត្រង់ នោះទំនាក់ទំនងរបស់អ្នកក៏កាន់តែរឹងមាំផងដែរ។ ទំនាក់ទំនងល្អ គឺជាផលនៃការទុកចិត្ត។ នៅពេលដែលមនុស្សស្គាល់គ្នាដំបូង គឺទាមទារធំបំផុតនូវភាពស្មោះត្រង់នេះឯង។ នៅពេលដែលយើងអង្កេតឃើញថា ពុំមានភាពស្មោះត្រង់នៅក្នុងទំនាក់ទំនងរបស់យើងហើយ វិធីល្អម្យ៉ាងគត់ គឺត្រូវដកខ្លួនចេញដោយស្ងៀមស្ងាត់ ដើម្បីជៀសវាងនូវជម្លោះ។
៥. របៀបនិយាយ
ការនិយាយត្រូវឲ្យសមស្របនឹងកាលៈទេសៈ ព្រមទាំងងាយយល់។ មិនត្រូវនិយាយគ្មានដឹងក្បាលកន្ទុយ រញ៉េរញ៉ៃ ព្រោះការនិយាយគ្មានរបៀបបែបនេះ នឹងធ្វើឲ្យអ្នកក្លាយជាមនុស្សអស់តម្លៃ។ បើអ្នកនិយាយពីរឿងអ្វីមួយ ហើយបែបជាឲ្យអ្នកស្ដាប់ ដឹកនាំអ្នកពីរឿងនោះទៅវិញ នោះនឹងធ្វើឲ្យអ្នកស្ដាប់អស់ជំនឿលើអ្នក។
៦. ការគោរពពាក្យសន្យា
ការមិនក្បត់ពាក្យសន្យា ជាគុណសម្បត្តិដ៏សំខាន់របស់មនុស្សដែលមានទំនាក់ទំនងល្អ។ មនុស្សយើងគ្មានតម្លៃ ដោយសារតែមិនគោរពពាក្យសន្យានេះឯង។ អ្នកត្រូវមានការប្រុងប្រយ័ត្នក្នុងការសន្យា បើមិនអាចធ្វើបានទេ កុំសន្យាឲ្យសោះ។
Source: http://pascalhuor.wordpress.com/